GEÇEN NÜSHADAN DEVAM-
Ali Paşa Fethali, Şah'ın sefirini cevabı reddi ile iade ve Şehri Zor Hükümeti'ni Halit Paşa'ya tevcih eylediğinden Şah müşarünileyh münfail olarak Abdürrahman Paşa'yı Tahran'a celp edüp, murassa kılıç ve hançer i'tâ ve hıl'at ıksâsıyla Şehri Zor eyaletini öhdesine tafviz ederek ol tarafa izam ve ol bapta muaveneti lâzımenin icrası zımnında Kürdistan hakimine emir ısdâr eyledi.
Halit Paşa sureti hale muttali oldukta beravi istimdat Bağdat'a azimet eyledi. Ali Paşa piyade, süvari, otuz bin askerle Bağdat'tan hareket edip Nihap arazisinde ordu kurdu. Ve hemşirezadesi olan Kethüda Süleyman Paşa'yı on beş bin askerle Şehri Zor'u istirdat için Abdürrahman Paşa'nın üzerine gönderdi. Ve Halit Paşa ile Kerkük mütesellimi Süleyman Paşa'yı dahi ana terfîk eyledi.
Abdürrahman Paşa hemen ilk hamlede mağlup olarak yine Kürdüstan'a firar etti. Bu muzafferiyet Ali Paşa'ya badi-i cesaret olarak İran'a tecavüz ile Takı kisra namı mahalle kadar zabıt ve istilâ eyledi.
Bu haber Sultaniye sahrasında Fethali Şah'a vasıl olmakla İşik Ağası Nevruz Han Kaçar maiyetiyle Ali Paşa üzerine bir ordu sevk eyledi. Paşa'yı müşarünileyh bu hareketten haberdar ondukta ricat ederek Şehri Zor ile Bağdat arasında vaki Şirvan Nehri kenarında tevakkuf eyledi.
Mumaileyh Nevruz Han refakatinde bulunan Muhammet Ali Han'ı Müdanlı ve Cihanbeyli ekradından ve Karagözlü Türkmen aşiretinden on bin süvari efrat ile Bağdat havalisine sevk edip bunlar Zehap ve Yakubiye ve Mendiliye kadar giderek oralarını nehîb ve garet eylediler. Zehap mütesellimi Fettah Paşa İranlıya müdafaa etmek istemiş ise de muktedir olamadığından gidip Ali Paşa ordusuna iltihak eyledi.
(Devam edecek)
Hikmet T. DAĞLIOĞLU