Bin iki yüz yirmi altı senesinde, Şakir ve Hayret Efendiler dahi refakatında olduğu hâlde, Hakan huldü âşiyan Sultan Mahmud Hanı sâni tarafından sefaretle Fetih Ali Şah nezdine irsal olunup sene-i mezkûre Rebiülâhiri evasıtında Tahran'a vasıl ve irade-i şahî veçhile Sadır âzam Mirza Şefi'nin konağına nazil oldu. Ve hamil olduğu name-i Hümayun ile Şah'a ve Sadır âzama olarak getirdiği hedaya-yi mülûkâneyi teslim eyledi. Sefir Müşarünileyhin memuriyeti; Baban Paşalarına ve bahusus Abdurrahman Paşa'ya İranlılar tarafından sahabet olunmaması ve bunlar bir gûna fesad ika ettikleri hâlde İran devleti tarafından zecr ve tedip kılınması ve Ahasha ve Kars taraflarında bulunan Devlet-i Aliyye serhad memurlarına lede'l-hace İranlı canibinden muavenet olunması iltimaslarından ibaret idi.
Fatih Ali Şah tarafından sefir müşarünileyhe hürmet olunup tebligat mezkûresi hakkında dahi şehir Zor ([1]) Paşaları İran devletinin inzimam re’yile intihap olunması ve Bağdat valilerinin dahi Devlet-i Müşarünileyha'ya karşı rızâ-cuyâne hareket eylemeleri şartlarıyla muvafakat gösterileceği cevabı verildi. Ve Azerbeycan'da Naibis-saltana Abbas Mirza nezdinde tevakkuf eylemesi teklif kılındı.
Abdülvahap Efendi, Tibriz'de bulunduğu esnada İranlılar Van sancağına tecavüzle Ermeni taifesinden birçok esir almış olmalarıyla, sefir müşarünileyhin vuku bulan iltimasına mebnî Abbas Mirza, üsera-yı merhumeyi bedeli mislile asker yedinden alarak itlak eyledi.
Abdülvahap Efendi, biraz vakit Tibriz'de kalıp andan sonra Iraklı Arap'ta İran askerinin nehbeylediği emvalin istirdâdı memuriyetiyle Tahran'a vürûd eden sefir Celâlettin Efendi dahi kendisine mülhak oldu. Ve orada ikisi birlikte ifâ-yı memuriyete sa'y edüp, Abdülvehap Efendi mehümaimken işlerini tesviye ile Dersaadet'e avdet eyledi.
Yazan: ANONİM
([1]) Kerkük ve Süleymaniye havalisi.
